مستحيل حد يكون عنده ذرة عقل أو منطق يقول إن كل الملتحين إرهابيين، أو كل المنتقبات إرهابيات.. ده تعميم ساذج وغير منطقي.
في ناس كتير ملتحين ومنتقبات وعايشين في المجتمع بأدب واحترام، لا رفعوا سلاح ولا حرضوا على المجتمع، حتى لو كان عندهم بعض الآراء والعادات المختلفة عن غالبية المصريين، لكن في النهاية لا بيضروا ولا بيتسببوا في مشاكل مجتمعية.. وماحدش في المقابل بييجي ناحيتهم.
الغالبية العظمى من الأفلام والمسلسلات وحتى البرامج اللي اتقدمت في مصر وظهر فيها الملتحين بشكل سلبي كانت بتتكلم عن فئة معينة، الإرهابيين، اللي هما بردو عادة بيكون ده شكلهم، دي مش مشكلة النقاب ولا اللحية بالمناسبة.
طيب اللي بيعمل عمل درامي أو فني وعاوز يتكلم عن فئة معينة، يجيب شكلها ولا يغير ويزور فيه؟
تعالوا نقرب الصورة بمثل متناقض تماما مع مثل الإرهابي، لو في دور في مسلسل ما هيظهر فيه شيخ أزهري، هل عادة هيظهر ببدلة وكرافتة، ولا هيظهر ببنطلون جينز مثلا، ولا هيظهر بالزي الأزهري الجميل العزيز على قلوبنا؟
بنفس الطريقة، في فئة معينة واخدة شكل معين، مش كل اللي بنفس الشكل إرهابيين، بس عادة كل الإرهابيين بيكونوا بنفس الشكل.
ده مالوش أي علاقة بالإسلام، ولا بالإساءة للإسلام، ولا الإسلام أصلا دين ضعيف علشان مسلسل ولا فيلم يستهدفه، المصريين بيعتزوا جدا بدياناتهم.. دي طبيعة فينا، وفكرة الإساءة للدين -أي دين- خارج كل مناقشاتنا، لإن دي قضية مرفوضة من مئات السنين.
