من لحظات أعلنت أسرة الصول “أحمد إدريس” صاحب فكرة الشفرة النوبية أثناء حرب أكتوبر وفاته عن عمر 84 سنة.. الصول “أحمد” الله يرحمه كان من الناس اللي ليهم دور مهم في الحرب ومن أسباب الانتصار.. إيه الحكاية؟
قبل الحرب بفترة بسيطة، وخلال التجهيز ليها اللي كان بيتم في منتهى السرية؛ كان فيه قلق من القيادة إن العدو يلقط الإشارات اللي بيبتعها الجنود المصريين للقيادة أو اللي بتيجي من القيادة للجنود!
ده كان قلق طبيعي جداً، ومشروع!.. أصل تخيل إن كل مجهودك اللي بتعمله ممكن يروح في لحظة لم تم فك الشفرة اللي بتتكلم بيها!.. القلق ماكنش عند القيادة بس لكن برضه عند بعض الجنود اللي منهم الجندي المصري الصغير “أحمد إدريس”..
في يوم راح “أحمد” للقائد بتاعه في الوحدة اللى موجود فيها، وقال له أنا عندي فكرة.. ليه ماتبقاش اللغة النوبية هي لغة إرسال الإشارات، ولو العدو حاول يفك الشفرة بتاعتها هيلاقي نفسه قدام لغة مالهاش أبجدية موثقة!.. القائد بلغ الفكرة للقادة، والقادة بلغوها للرئيس “السادات” اللي قال فوراً وبسرعة: (هاتوا الصول ده).
لحظات، وكان “أحمد إدريس” واقف قدام الرئيس “السادات” بيشرح فكرته بمنتهى التفصيل.. الرئيس ضحك لدرجة إن “أحمد” افتكر إنه قال حاجة غلط.. الرئيس ماداش أى رد لـ “احمد” وطلب منه إنه اللي اتقال بينهم يفضل سر ومحدش يعرفه نهائياً.. “أحمد” نفذ الأمر، ولما كان حد بيسأله في الوحدة بتاعته عملت إيه مع الرئيس أو كان عايزك ليه كان بيرد إنه كان بيسأله عن بيوت النوبة القديمة وأهل النوبة بعد التهجير..
أيام بسيطة وفوجيء “أحمد” إنه مكلف ومعاه 344 جندي مصري نوبي على دراية تامة باللغة النوبية إنهم يتولوا إرسال الإشارات بالنوبي!.. وحصل فعلاً!.. من الكلمات اللي كانت بتستخدم يقولوا مثلاً فيه 20 “أولوم” يعني “تمساح” بالنوبي ومعناها بالعربي دبابة.. فيه 30 “أسلانغي” يعني “ثعبان” بالنوبي ومعناها بالعربي يعني عربية مصفحة، وهكذا!.
الحاج “أحمد إدريس” الله يرحمه قال في حوار صحفي معاه: (ثلاثة أشياء صنعت النصر إضافة إلى إرادة الله: دهاء وحكمة الرئيس السادات في خطة الحرب والتمويه الذي سبقها، وفكرة خراطيم الماء التي أسقطت خط بارليف التي اقترحها الراحل اللواء مهندس باقي زكي يوسف، وفكرتي باستخدام اللغة النوبية شفرة لرسائل الجيش وتعليماته).
تم تكريم الحاج “أحمد إدريس” من الرئيس “عبدالفتاح السيسي” في احتفالات أكتوبر 2017 بـ وسام النجمة العسكرية.
“أحمد إدريس” بطل مصري أصيل من جنود مصر اللي التاريخ هيفضل فاكرهم.. ربنا يرحمه ويرزقه الجنة.
